ИСЛАНД УЛСЫН алдарт BLUE LAGOON рашааны тухай

Blue Lagoon нь Исландын хамгийн алдартай геотермаль рашаан сувиллын цогцолбор бөгөөд хар лавын талбай дунд байрлах сүүн цэнхэр өнгөтэй, халуун эрдэс усаараа онцлогтой. Газрын гүнээс гарч ирсэн эрдэс баялаг ус нь арьсанд тустайгаараа алдартай бөгөөд жил бүр дэлхийн өнцөг булан бүрээс жуулчдыг татдаг. Орчин үеийн спа үйлчилгээ болон байгалийн өвөрмөц тогтоц хосолсон энэ газар нь Исландын аялал жуулчлалын бэлгэ тэмдэг болсон юм.

Blue Lagoon-ийн түүх нь орчин үеийн аялал жуулчлалын нэгэн сонирхолтой жишээ бөгөөд анхнаасаа аяллын зориулалттай газар байгаагүй юм. 1970-аад онд Исландын баруун өмнөд хэсэгт байрлах Svartsengi геотермаль цахилгаан станц  баригдаж, газрын гүнээс халуун ус гарган эрчим хүч үйлдвэрлэж эхэлсэн. Энэхүү үйл явцын дараа үлдсэн эрдэс бодис ихтэй халуун ус лавын талбайд асгарч, аажмаар хуримтлагдан жижиг нуур үүссэн нь хожим Blue Lagoon болсон юм.

Анх энэ нуур нь ямар ч төлөвлөлтгүй, зүгээр л үйлдвэрийн “дайвар бүтээгдэхүүн” байсан боловч 1981 онд нэгэн орон нутгийн иргэн энэ усанд орж үзэхэд арьсны өвчин нь сайжирсан тухай яриа тархаж, хүмүүс зорьж очин усанд орж эхэлжээ.

1992 онд Blue Lagoon-ийг албан ёсоор олон нийтэд зориулсан рашаан сувилал болгон хөгжүүлж, үйлчилгээний төв байгуулсан. Үүнээс хойш дэд бүтэц, судалгаа, эмчилгээний чиглэлээр тасралтгүй хөгжиж, 1990-ээд оны сүүл гэхэд Исландын хамгийн их жуулчин татдаг газруудын нэг болсон.

2000-аад оноос эхлэн тус газар улам тэлж, зочид буудал, тансаг спа үйлчилгээ, судалгааны төвүүд нэмэгдсэн. Мөн усны найрлага, арьсанд үзүүлэх нөлөөг шинжлэх ухааны үндэслэлтэй судалж, гоо сайхны бүтээгдэхүүн хүртэл үйлдвэрлэж эхэлсэн.

Усан дотор байрлах “silica bar” гэж хэсэг байдаг бөгөөд хүмүүс тэндээс шууд шавар маск авч нүүрэндээ түрхдэг. Энэ нь тухайн газрын хамгийн алдартай зүйлсийн нэг юм. Усны гүн ихэвчлэн 0.8–1.4 метр байдаг тул амарч суухад маш тохиромжтой юм.

Blue Lagoon-ийн ус нь энгийн халуун рашаан биш, далайн ус болон газрын гүний халуун усны холимог байдаг. Тиймээс давслаг бөгөөд эрдэс бодисын агууламж өндөртэй. Усанд агуулагдах цахиур, хүхэр зэрэг бодисууд нь арьсыг зөөлрүүлж, тайвшруулах үйлчилгээтэй гэж үздэг.

Усны өнгө нь байнга өөрчлөгдөж байдаг. Цэнхэр, сүүн цагаан өнгө нь гэрлийн тусгал болон усанд агуулагдах цахиурын бөөмсөөс шалтгаалдаг. Нарны гэрэл, цаг агаар, улирлаас хамаарч өнгө нь илүү тод эсвэл бүдэг харагдаж болно. Өнөөдөр Blue Lagoon нь энгийн нэг үйлдвэрийн уснаас үүссэн нуур биш, харин Исландын аялал жуулчлалын бэлгэ тэмдэг болж, жил бүр олон зуун мянган жуулчдыг татдаг дэлхийн хэмжээний рашаан сувиллын цогцолбор болон хөгжсөн юм.